Talabalikning xalqaro bosqichi: Xolmirzayeva Sevinch Italiyada

• 15-fevral, 2025

Italyan tilini yanada chuqurroq o‘rganish va tarjimonlik sohasida bilimlarini rivojlantirish maqsadida O‘zbekiston davlat jahon tillari universiteti Tarjimonlik fakulteti 2-bosqich talabasi Xolmirzayeva Sevinch Erasmus+ dasturi doirasida Italiyaga yo‘l oldi.

17-fevraldan boshlab, u Italiyadagi nufuzli oliygohlardan biri — Siena Xorijliklar uchun Universiteti (UNISTRASI) da tahsil oladi. Bu universitet butun dunyodan kelgan talabalar uchun italyan tili va madaniyatini o‘qitish bo‘yicha yetakchi markazlardan biri bo‘lib, Sevinch uchun til ko‘nikmalarini oshirish va tarjimonlik sohasida yangi bilimlarni egallash uchun ajoyib imkoniyatdir.

Erasmus dasturi Sevinchga nafaqat til bilimlarini mustahkamlash, balki xalqaro tajriba orttirish va turli mamlakatlardan kelgan talabalar bilan muloqot qilish orqali madaniyatlararo aloqalarni rivojlantirish imkonini ham beradi. Siena shahrida o‘qish unga Italiya madaniyatiga yanada chuqurroq sho‘ng‘ish, tarixiy va ilmiy muhitda tajriba orttirish imkoniyatini taqdim etadi.

Xolmirzayeva Sevinchga ilm yo‘lida ulkan muvaffaqiyatlar tilaymiz va ushbu tajribaning kelajakdagi akademik va professional yo‘nalishida mustahkam poydevor bo‘lishiga ishonamiz!