It
O‘zbekiston-Italiya akademik hamkorligi: Talabalarimiz Insubriyada, kafedra mudirasi xalqaro tashrifda
O‘zbekiston davlat jahon tillari universiteti Tarjimonlik fakulteti italyan tili yo‘nalishida tahsil oluvchi 10 nafar talaba qiz Italiyaning Insubria universitetida 6 oy davomida grant asosida o‘qish imkoniyatini qo‘lga kiritishdi. Ular Italyan tili tarjima nazariyasi va amaliyoti kafedrasi mudiri Baxora Ergashova hamrohligida Italiyaga yetib borishdi.
Talabalar 3-fevral sanasidan boshlab ushbu nufuzli oliygohda o‘qishni boshladilar. Ular o‘qishning ilk kunlaridanoq o‘zlarining bilim va salohiyatlarini namoyish etib, o‘z mutaxassisliklari bo‘yicha chuqur bilim olishga intilmoqdalar. Bundan tashqari, qizlar va kafedra mudirasi Milan shahrida o‘zbek milliy liboslarini namoyish etishdi, bu esa italyanlar sayohatchilar orasida katta qiziqish uyg‘otdi. O‘zbekiston madaniyati haqida ko‘proq bilishga qiziqish bildirdi.
Mazkur tashrif doirasida kafedra mudirasi Baxora Ergashova xalqaro hamkorlikni mustahkamlash, yangi akademik va grant imkoniyatlarini izlash maqsadida Milan, Turin, Venetsiya va Perudja shaharlariga safarni amalga oshirdi. Venetsiya va Turin shaharlarida nufuzli universitet vakillari bilan uchrashib, talabalar almashinuvi, qo‘shma ilmiy tadqiqotlar va grant dasturlarida ishtirok etish bo‘yicha muzokaralar olib borildi. Shuningdek, Milan va Perudja shaharlarida tilshunoslik va tarjima sohasidagi yetakchi mutaxassislar bilan uchrashuvlar tashkil etildi. Perudjaga tashrifi davomida Perudja Xorijliklar uchun Universiteti bilan hamkorlikda O‘zbekistonda CELI imtihonini tashkil etish bo‘yicha dastlabki qadamlar qo‘yildi.
Bu kabi tashriflar Italyan tili kafedrasi talabalari uchun xalqaro akademik tajribani oshirish, yangi grant imkoniyatlaridan foydalanish va O‘zbekiston va Italiya o‘rtasidagi madaniy hamkorlikni rivojlantirish uchun muhim ahamiyat kasb etadi.
Talabalarimizga muvaffaqiyat va sermazmun tahsil, ustozlarimizga esa xalqaro hamkorlikni kengaytirish yo‘lidagi ishlarida ulkan yutuqlar tilaymiz!
